Yangiliklar
"Yashil" iste`mol kreditlari uchun kompensatsiya beriladi
Tarmoqlararo energiya tejash jamg'armasi "yashil" iste'mol kreditlari bo'yicha foiz stavkalarining bir qismini qoplash uchun 3 yilgacha kompensatsiya beradi. Kredit hajmi 500 BRV (165 million so‘m), foiz stavkasi esa Markaziy bankning asosiy stavkasining 1,5 baravaridan, lekin 5 foiz punktidan oshmasligi kerak.
“Yashil” iste’mol kreditlari bo‘yicha tijorat banklarining skoring tizimidan ijobiy xulosaga ega bo‘lgan hamda ariza berish vaqtida muddati o‘tgan kreditlar va soliqlar bo‘lmagan jismoniy shaxslarga kompensatsiya to‘lanadi.
Jamg‘arma taqdim etilgan hujjatlarni ular olingan kundan boshlab 2 ish kuni ichida ko‘rib chiqadi, shundan so‘ng kompensatsiya ajratilganligi yoki uni berish rad etilganligi to‘g‘risida ma’lumotnoma beriladi.
Kompensatsiya to‘lovlari to‘lash rad etilmagan ariza ko‘rib chiqilgandan keyin 3 ish kuni ichida tijorat bankiga o‘tkaziladi.
Jamg‘arma quyidagi hollarda tijorat banklarining kreditlari bo‘yicha kompensatsiya berishni to‘xtatib turadi:
• foizlar to‘lovi qoplangan holda kreditdan noto‘g‘ri foydalanilganda;
• qarz oluvchi ketma-ket 3 oy davomida to‘lov jadvaliga muvofiq bankka to‘lovlarni to‘lash bo‘yicha majburiyatlarini bajarmasa;
• qarz oluvchidan kredit summasi va unga hisoblangan foizlar muddatidan oldin undirilganda;
• tijorat banki bilan qarz oluvchi o‘rtasidagi kredit shartnomasi bekor qilingan yoki haqiqiy emas deb topilgan bo‘lsa;
• qarz oluvchining bank hisobvarag‘i xatlanganda;
• qarz oluvchi yoki tijorat banki tomonidan taqdim etilgan hujjatlarda noto‘g‘ri ma’lumotlar aniqlangan taqdirda.
Yangi "yashil" iste'mol krediti bo'yicha, allaqachon kompensatsiya berilgan jismoniy shaxs quyidagi hollarda kompensatsiyani qayta olishi mumkin:
• amaldagi kredit shartnomasi bo‘yicha kredit qarzi to‘liq to‘langanda;
• “yashil” iste’mol kreditini berish to‘g‘risidagi shartnoma bekor qilinganda yoki haqiqiy emas deb topilganda;
• Jamg'arma kompensatsiya to'lashni to'xtatish to'g'risida qaror qabul qilganda.
Eslatma: Yashil iste'mol krediti - bu quyosh fotoelektr stansiyalari, quyosh suv isitgichlari va shamol stansiyalarini o'rnatish kabi aniq maqsadlar uchun jismoniy shaxslarga mahalliy valyutada beriladigan kredit.
